Швед ауруханасының емделушісі өзіне-өзі операция жасады
АСТАНА. Тамыздың 5-і. ҚазАқпарат - Швецияның солтүстігінде орналасқан Сундсвалль қаласы ауруханасының жедел көмек бөлімшесінің емделушісі дәрігерді күте-күте шыдамы таусылғандықтан, өзінің аяғындағы жарасын өзі тігіп алды, деп жазады The Local. Юнас (тегі, әкесінің аты айтылмаған) есімді 32 жасар азаматтың айтуынша, ол қабылдау бөлмесінде бір сағаттан астам уақыт күткенімен, дәрігерлердің ешбірі көмек көрсетпеген сыңайлы.
Юнастың айтуынша, ол аяғын духовканың қырына соғып алып, жарақаттап алыпты. Жараның орны терең болғандықтан, ол дәрігерлердің көмегіне жүгінуге бел буып, алдымен емханаға барады, бірақ ол жер жабық болып, қалалық ауруханадан көмек сұрауға келеді.
Қабылдау бөлімінде бір сағаттан астам уақыт отырған ол, өзінің аяғындағы жарасын мамандардың көмегінсіз емдеп алмақшы болып шешеді. «Жан-жағыма қарасам, инелер мен жіптердің топтамасын көзім шалды. Содан кейін мен оларды алып, өзімнің жарамды өзім тіге бастадым», - деді швед. Ол атап өткендей, өзіне-өзі операция жасау кезінде ауырғаннан жаны көзіне көрінсе де, өзіне басқалардың назарын аудармау мақсатында тістеніп отырды.
Аурухананың пациенті өз жарасын өзі тігіп алғанынан хабардар болған дәрігерлік мекеменің қызметкерлері құралдарды рұқсатсыз алғаны үшін оның үстінен полицияға шағым жазды.
