Швецияда Ozempic препаратының контрабандасы мен заңсыз сатылымы күрт өскен

АСТАНА. KAZINFORM — Ozempic алғашында диабетке қарсы дәрі ретінде жасалған, алайда кейін тәбетті басып, салмақты азайту қабілетін көрсетті, деп жазды AZƏRTAC.

Мемлекеттік фармацевтикалық басқарманың мәліметінше, бұл қылмыстық іске бұрын есірткі мен допинг сатқан топтар да араласа бастаған.

Кеден қызметі қазірдің өзінде жалған препараттың ірі партияларын — капсулалар мен жүздеген құтыны тәркілеген, дегенмен бұл нарықтың тек аз ғана бөлігі екені айтылып отыр. Жыл басынан бері 400-ден астам инъекциялық қалам мен ампула тәркіленген. Норвегия кеден қызметі де Швециядан жіберілген партияларды ұстаған.

Жалған Ozempic әлеуметтік желілерде, оның ішінде инфлюенсерлер арқылы белсенді жарнамалануда. Фармацевтикалық басқарма бұл препаратты заңсыз сататын шамамен 20 сайтты анықтаған. Бұл сайттардың артында ақша жымқырумен де айналысатын бірнеше ұйымдасқан желілер тұр.

Мамандар ескертеді: жалған дәрілердің нақты құрамын ешкім білмейді, сондықтан денсаулыққа қауіп зор. Артық дозалану салдарынан ауруханаға түсу жағдайлары тіркелген, сондай-ақ түрлі белсенді заттар араласқан қоспалар табылған.

Ozempic сатқаны үшін бір жылға дейін бас бостандығынан айыру жазасы қарастырылған, алайда заңнамадағы олқылықтар мен ресурстың шектеулігіне байланысты полиция мен кеден бұл нарықпен тиімді күресе алмай отыр. Үкімет фармацевтикалық басқармаға мәселені шешу жолдары бойынша ұсыныстар дайындауды тапсырды — есеп келесі жылдың қаңтарында күтіледі.

Еске сала кетейік, бұған дейін Швецияда жастар арасында ішек қатерлі ісігіне шалдыққандар саны артып келе жатқанын жазған едік.