Швейцарияның байқаушылары Қазақстандағы сайлау мінсіз өтті деп санайды
АСТАНА. 4 сәуір. ҚазАқпарат /Арман Асқаров/ - ҚР Президентінің кезектен тыс сайлауы таза әрі мінсіз өтті. Швейцариянның Демократия және коммуникациялар институтының директоры Питер Штатуб елімізде өткен президенттік сайлауға осындай баға берді.
«Иә, біз 6 сайлау учаскесінде болдық. Ол жерлердегі дауыс беру жұмысымен танысып, сайлау науқанының таза әрі мінсіз өткендігіне көзіміз жетті. Бәрі әділ болды. Біз ешқандай кемшіліктерді байқаған жоқпыз», - дейді П.Штатуб. Өз сөзінде шетелдік байқаушы сайлауалды үгіт-насихатқа бөлінетін уақытты ұзарту қажеттігін ерекше атап өтті. «Мен өз кезегімде кандидаттардың сайлауалды жұмыстарына қажетті мерзімді ұзарту бойынша кеңес берер едім. Оған 5-6 ай берілсе, Қазақстанның демократиялық ұстанымы күшейер еді. Жалпы, Қазақстанда өткен президенттік сайлау жоғары деңгейде ұйымдастырылып, Еуроодақтың барлық талаптарына жауап береді», - деп атап көрсетті П.Штатуб.
