Шығыс Қазақстан облысы Қылмыстық-атқару жүйесінің қызметкерлері мен сотталғандар су тасқынынан зардап шеккендерге көмектесу акциясын өткізуде
АСТАНА. Сәуірдің 2-сі. ҚазАқпарат /Ғалымжан Хасенов/ - Шығыс Қазақстан облысы Қылмыстық-атқару жүйесінің қызметкерлері мен сотталғандар Алматы және Шығыс Қазақстан облыстарындағы су тасқындарынан зардап шеккендерді қолдау мақсатында бүгін қайырымдылық шарасын өткізіп жатыр.
Бұл туралы Қылмыстық-атқару жүйесі комитетінің Шығыс Қазақстан облысы бойынша басқармасынан хабарлады.
Басқарманың баспасөз хатшысы Еркен Қасымовтың айтуынша, облыстың пенитенциарлы жүйесінің қызметкерлері, «Еңбек-Өскемен» республикалық мемлекеттік кәсіпорнының жұмысшылары су тасқынынан зардап шеккен Қызылағаш ауылы мен Тарбағатай ауданының ауылдарына көмектесу шарасын бірауыздан қолдап, арнайы есепшоттарға ақша аударды. «Еңбек-Өскемен» кәсіпорны сондай-ақ ұнмен де көмектеспек.
«Апат бөтендікі болмайды. Облыстың түзету мекемелеріндегі өндірістерде жұмыс істейтін көптеген сотталушылар да біркүндік жалақыларын аударып, шама-шарқынша көмек көрсетуге ниет білдіруде», деп атап көрсетті Е.Қасымов.
