Шығыс Қазақстан облысының жолдарында үш күннің ішінде 800 автокөлік қар құрсауында қалып қойды

Бұл туралы бүгін Үкімет отырысында Көлік және коммуникация министрі Әбілғазы Құсайынов мәлім етті, деп хабарлайды ҚазАқпарат.

ШҚО-дағы жағдайға тоқталған министр, «соңғы үш күнде 803 автокөлік қар құрсауында қалып қойды. Оның ішінде 28 автобус бар», деді.

Ә. Құсайыновтың сөзіне қарағанда, ШҚО-да қар тазалайтын 157 арнайы техника жұмылдырылған.

Облыстағы республикалық жүйедегі 884 шақырым жолда немесе 25 пайызында қардың басуы 1-ден 3,5 метрге дейін жеткен. «Яғни, көктем өте қиын болмақ», деді министр.

Оның айтуынша, көктемгі су тасқынынан кейін бұл жолдарда күрделі жөндеу жұмыстарын жүргізу қажет болады.