Шығыс Қазақстанда алдағы қос мерекеге орай 350-ге жуық іс-шара өтеді
Шығыс Қазақстанда алдағы қос мерекеге орай барлық қала, ауданда 342 шара өткізілмек. Бұл туралы ШҚО Қоғамдық даму басқармасының басшысы Жанат Мекеева мәлім етті.
«7 мамыр - Отан қорғаушылар күні аясында 151 шара ұйымдастырылады. Оның ішінде мерекелік концерттер, әскери-патриоттық шаралар, әскери бөлімдерде Ашық есік күндері, түрлі акциялар мен челлендждер бар. Сондай-ақ облыстың барлық мектебінде «Ерлік сабақтары» өткізіледі», - дейді ол.
7 мамырда Өскемендегі Даңқ мемориалында «Жас сарбаз» әскери-патриоттық клубтарының шеруі жоспарланған.
«Жеңіс күнінде өңір бойынша 190-нан астам шара өтіп, 24 мыңнан астам адам қамтылады. Алдағы мерекелердің басты құндылығы мен маңызы – өскелең ұрпақты патриоттыққа тәрбиелеу, отансүйгіштікке баулу. ҰОС ардагерлеріне ерекше көңіл бөлінеді. Олар үшін 23 атаулы шара, оның ішінде «Ардагерлерді ардақтайық» акциясы ұйымдастырылады», - дейді Ж.Мекеева.
9 мамырда Өскеменде таңертең Даңқ мемориалына гүл шоқтары қойылып, сағат 18.00-де кешкі концерт, ал сағат 21.00-де шамдар жағылып, еске алу акциясы өткізіледі. 22.00-де отшашу атылады.