Шығыс Қазақстанда үш учаскеде жол жабылды

ӨСКЕМЕН. ҚазАқпарат – Шығыс Қазақстан облысында қар көшкіні қаупіне байланысты үш жол жабылды, деп хабарлайды ҚазАқпарат тілшісі.

ШҚО Төтенше жағдайлар департаменті баспасөз қызметінің мәліметіне сүйенсек, өңірдегі үш тасжол учаскесінде қар көшкіні түсуі ықтимал.

«Республикалық маңызы бар «Өскемен-Алтай-Үлкен Нарын-Катонқарағай- Рахман қайнарлары» тасжолының 6-166 шақырымында (Ушанов ауылы мен Алтай қаласының аралығы), облыстық маңыздағы «Өскемен-Таулы Үлбі-Солтүстік» тасжолының 30-37 шақырымында және «Өскемен-Тарғын-Самар» тасжолының 88-145 шақырымында көліктің барлық түрі үшін қозғалысқа тыйым салынды», - делінген ақпаратта.

Осы ретте, құтқарушылар өңір жұртшылығына алыс сапарға шығар алдында жолдардың жай-күйін «Дәрмен» мобильдік қосымшасы арқылы тексеріп отыруға кеңес берді.