Шығыс Қазақстанда жеңіл көлік пен автобус соқтығысып, бір адам қаза тапты, екі адам ауруханаға түсті

АСТАНА. Ақпанның 20-сы. ҚазАқпарат - Шығыс Қазақстан облысының Жарма ауданында Өскемен-Алматы тас жолының 137-ші шақырымында «ВАЗ-21011» жеңіл көлігі мен «ДАФ» жолаушылар автобусының соқтығысуы салдарынан «Жигулидің» 54 жастағы жүргізушісі қаза болды.

ҚазАқпарат бұл туралы Төтенше жағдайлар министрлігінің баспасөз қызметіне сілтеме жасап хабарлайды. Жол-көлік оқиғасы кеше, ақпанның 19-ы күні күндіз орын алған. Соқтығысу кезінде автобуста 12 адам болған. Төтенше жағдайлар ведомствосының ақпараты бойынша, апат салдарынан «ВАЗ» көлігінің екі жолаушысы: 49 жастағы әйел мен 25 жастағы жігіт түрлі жарақатпен ауруханаға түскен.