Шымбұлақта не өзгерді: жаңа әжетхана, 3 қар ату жүйесі...
АЛМАТЫ. ҚазАқпарат - «Шымбұлақ» курортындағы өзгерістер туралы Instagram парақшасында курорт директоры Ержан Еркінбаев айтты, деп хабарлайды ҚазАқпарат тілшісі.
Біріншіден, тау шаңғысы курортының жоғарғы жақтарында қар ату жүйесі күшейтілген.
«Жаз бойы біз қар атудың 3 жаңа тармағын жасадық. Енді 35 зеңбірек қар атуға дайын тұр. Шымбұлаққа қар жаудыра бастаймыз. Шаңғымызды дайындап, қысқы демалысқа шығамыз», - деді Ержан Еркінбаев.
Сонымен қатар, «Шымбұлақтың» жоғарғы тұсында көпшіліктің көптен күткен нысаны - әжетхана пайда болды.
«3 жыл бұрын біз Шымбұлақта аса күрделі жобаны қолға алған болатынбыз. Ол - Талғар асуында әжетханалар желісін салу. Құрылыс уақыты қысқа, ауа райының ахуалы қатаң болған соң әжетхананы іске қосу қиындап кетті. Енді бір кісілерді шақырып, қызыл лента кескізіп, ат қойсақ та болады. Идея тастаңыздар. Шыдамсыздана күткен адамдар мен ұжымның атынан алғыс айтамын», - деді Ержан Еркінбаев.
Мұның алдында заңгер Джохар Өтебеков Шымбұлақ тау шаңғысы курортында адамдарға қолайлы жағдай жасалмағанын айтқан болатын. Ол бірнеше шақырымға созылған кешен ішінде бір де бір әжетхана жоқтығын алға тартқан еді.
