Шымкент дәрігерлері инфекциялық стационардағы соңғы науқасты үйіне шығарып салды
ШЫМКЕНТ. ҚазАқпарат- Шымкентте инфекциялық стационардағы дәрігерлер соңғы науқасты үйіне шығарып салды, деп хабарлайды ҚазАқпарат тілшісі.
Коронавирус індетін жеңіп шыққан 70 жастағы қария инфекциялық стационардан шығарда дәрігерлер үлкен қошемет көрсетті.
Ауруынан құлан таза айыққан тұрғын да дәрігерлерге ризашылығын білдіріп, алғысын айтты.
Бисенбек Усербаев орталықта ем алып шыққан соңғы науқас.
Егде жастағы қарт кісінің қауіпті инфекцияны жеңіп шығуы дәрігерлер үшін жетістік, қауіпті инфекцияны жеңуде жемісті жеңіс.
Айта кетейік, қаладағы эпидахуал ушыққанда «Ақжайық» шағынауданында модульді жұқпалы аурулар госпиталі ашылған болатын. Емдеу мекемесінде дәрігерлер коронавирусқа шалдыққан ауыр жағдайдағы науқастарды қабылдап, күшейтілген режимде жұмыс істеді.
200 орынға лайықталған стационар 2020 жылдың 10-маусым күні ашылып, 2022 жылдың 28-ақпан күні соңғы науқасты үйіне шығарды.
Мұнда соңғы екі жылдың ішінде он мыңға жуық науқас ем алып шыққан.
