Шымкент тұрғындары WhatsApp-пен тараған жалған хабарламаға алданды

None
None
ШЫМКЕНТ. ҚазАқпарат - Шымкентте әлеуметтік желілер арқылы балаларға «мектепке қажетті құралдар тегін үлестірілетіндігі» туралы хабарлама тарағаннан кейін, көптеген ата-ана балаларын ерітіп, қала орталығындағы Пушкин кітапханасына жиналды, деп хабарлайды «ҚазАқпарат» ХАА тілшісі.

Әлеуметтік желідегі жалған ақпарат бірқатар ауданның да тұрғындарын  әлекке салды. Кітапхана алдына Арыс қаласы мен  Ордабасы ауданынан да ата-аналар келген. Олардың барлығы да жаңа оқу жылы қарсаңында ұялы телефондарына  «WhatsApp» желісі арқылы  хабарлама түскенін айтады. Онда «2010 және 2011 жылы туған балаларға мектепке қажетті құралдар  тегін таратылады» делінген.  Ата-аналар ақпараттың жалғандығын кітапхана алдына келгенде бір-ақ білді.

«Біз бұл жерге балаларымызбен бірге келген едік. Алайда хабарламаның өтірік екенін біліп отырмыз. Сол хабарлама жібергендер тым болмаса кітап, сызғыш берсе де өкпелемес едік. Балаларды оқу басталмай жатып өтірікке баулып отырмыз. Бұл жерде жағдайы орташа және нашарлары да бар», - дейді Шымкент қаласының тұрғыны Орынкүл Әбдірайымова.

Ата-аналар хабарламаның жалған екендігіне әбден көз жеткізгеннен кейін үйлеріне тарқасты.

Қазір  Оңтүстік облыстық Ішкі істер департаментінің өкілдері  бұл ақпараттың шығу төркінін анықтауда.   

Соңғы жаңалықтар