Шымкентте 80 жастағы әжей коронавирустан жазылып шықты
ШЫМКЕНТ. ҚазАқпарат - Шымкентте 80 жастағы әжей коронавирустан жазылып шықты, деп хабарлайды ҚазАқпарат тілшісі.
Дәрігерлер қарт кісіден коронавирус инфекциясын дер кезінде анықтаған. Нәтижесінде әжейді емдеу кезінде асқынулар болмаған.
Cонымен қатар, медицина мамандары 7 айлық жүктілік кезеңіндегі әйелден коронавирус инфекциясын анықтап, емдеу шараларын жүргізген. Екі аптаға жуық дәрігерлердің бақылауында болған келіншектің жағдайы жақсарып, 7 маусым күні ауруханадан шығарылған. Қалалық тауарлар мен көрсетілетін қызметтердің сапасы, қауіпсіздігін бақылау департаментінің мәліметінше наурыз айынан бері үшінші мегаполисте COVID-19 1176 жағдайы тіркелген. Олардың арасында халықаралық жүк тасымалының жүргізушілері мен Польшадан ұшып келген жолаушы, Ресей Федерациясынан келген азаматтар мен сонда жұмыс істеп жүргендер бар.
