Шымкентте есірткіні түзеу мекемесіне кіргізбек болған күдікті 7 жылға сотталды
ШЫМКЕНТ. ҚазАқпарат - Шымкент қаласы Еңбекші аудандық соты есірткі тасымалдаған күдіктіге қатысты үкім шығарды, деп хабарлайды ҚазАқпарат тілшісі.
29 жастағы күдікті Шымкенттегі түзеу мекемесінде жазасын өтеп отырған танысына есірткі затын жеткізбек болған. Арнайы автокөлік жалдап, мекеме қорғанына жақындаған сәтте 3 дана домалақ пішінді жапсырмамен (скотчпен) оралған есірткі затын мекеменің қоршаудан асыра лақтырып, бой тасалаған. Бұл жағдайды дер кезінде байқаған түзеу мекемесінің бақылаушылары оқиға орнына полицияның жедел-тергеу тобын шақырған.
«Тәркіленіп алынған заттар, сараптама нәтижесімен жалпы салмағы 122,6057 грамды құрайтын «кептірілген марихуана» және 66,7945 грамды құрайтын «гашиш» есірткі заттары екендігі анықталды. Жедел-іздестіру іс-шаралары нәтижесінде, осы қылмысты жасаған Түркістан облысының тұрғыны ұсталды», - делінген Шымкент қаласы полиция департаментінің баспасөз қызметі таратқан хабарламада.
Шымкент қаласы Еңбекші аудандық сотының үкімімен күдікті ҚК-нің 297-бабының 2-бөлігінде көзделген қылмыстық құқық бұзушылықты (ірі мөлшерде есірткі, психотроптық заттарды, сол тектестерді өткізу мақсатында заңсыз дайындау, қайта өңдеу, иемдену, сақтау, тасымалдау, жөнелту не өткізу) жасағаны үшін кінәлі деп танылды.
