Шымкентте фонтанға шомылған 10 жасар бала көз жұмды

ШЫМКЕНТ. ҚазАқпарат - Шымкентте субұрқақта шомылған 10 жасар бала мерт болды, деп хабарлайды ҚазАқпарат тілшісі.

Қайғылы оқиға кеше кешкісін болды. Н.Назарбаев даңғылында орналасқан субұрқаққа түскен 10 жастағы жеткіншек суға батып кеткен. Бұл туралы сағат 19:30 шамасында Төтенше жағдайлар департаментінің дағдарыс жағдайларды басқару басқармасына хабарлама түскен.

«Бала ата-анасының қадағалауынсыз жүрген. Қазір Полиция департаменті сот-медициналық сараптама тағайындады», - делінген Шымкент қаласы ТЖД қоғаммен байланыс тобы таратқан ақпаратта.

Жалпы Шымкент қаласы аумағында суда жаппай демалу, туризм және спортпен шұғылдану үшін 5 ресми орын белгіленген. Оның ішінде үшеуіне шомылуға рұқсат етілген. Ал қала аумағында жалпы 32 фонтан бар. Оның 25-і жұмыс істеп тұр.