Шымкентте коронавирус жұқтырғандардың қатарында 13 жастағы жасөспірім бар
ШЫМКЕНТ. ҚазАқпарат – Шымкентте соңғы тәулікте тағы үш адамның COVID-19 инфекциясын жұқтырғаны анықталды. Дәрігерлер науқастардың қатарында 13 жастағы жасөспірім бар екенін айтады, деп хабарлайды ҚазАқпарат тілшісі.
Қалалық төтенше жағдайлар штабының мәліметінше, қауіпті індет жұқтырғандардың барлығы да бұған дейінгі науқаспен қарым-қатынаста болған. Олар карантиндік стационарға жатқызылып, зертханалық сынамалар алынған.
«Бір науқас 2006 жылы туған жасөспірім болса, екеуі 1967 және 1971 жылы туған әйелдер. Диагностикалық зерттеу қорытындысы олардан COVID-19 вирусын анықтады. Қазіргі таңда науқастардың жағдайлары қанағаттанарлық. Бекітілген хаттамаға сәйкес тиісті ем жүргізілуде. Науқастармен қарым-қатынаста болған адамдар анықталып, барлығы медициналық бақылауға алынуда. Ауру ошақтарында эпидзерттеу және дезинфекциялық жұмыстар жүргізілуде» делінген хабарламада.
Айта кетейік, Шымкентте COVID-19 коронавирустық инфекциясына шалдыққан адамдардың саны 23-ке жетті.
