Шымкентте медицина қызметкерлеріне төсбелгілер табысталды
ШЫМКЕНТ. ҚазАқпарат – Шымкентте Денсаулық сақтау басқармасының ұйымдастырумен Қазақстан Республикасының Тәуелсіздік күніне арналған мерекелік іс-шара өтті. Салтанатты жиында медицина саласының дамуына өз үлестерін қосып жүрген бірқатар қызметкер марапатталды, деп хабарлайды ҚазАқпарат тілшісі.
Денсаулық сақтау саласының үздіктерін ҚР Денсаулық сақтау вице-министрі Камалжан Надыров және денсаулық сақтау басқармасының басшысы Асхан Байдувалиев марапаттады. «Денсаулық сақтау ісінің үздігі» төсбелгісі қалалық стоматологиялық емханасының дәрігері Қасенов Полатбек, №2 қалалық ауруханасының бас дәрігері Сәрсен Пернебеков және Денсаулық сақтау басқармасының бас маманы Дулат Тұрмановқа табысталды. Сондай-ақ, «Денсаулық сақтау саласына қосқан үлесі үшін» және «Денсаулық сақтау саласының ардагері» төсбелгілерімен 9 медицина маманы марапатталды. Ал, 9 дәрігер Құрмет грамоталары мен алғыс хаттар алды. Марапатталғандардың қатарында №1 қалалық клиникалық ауруханасы кадр бөлімінің бастығы Сәуле Тұрманқызы мен нейрохирургия орталығының медбикесі Айсұлу Елеусінқызы да бар.
