Шымкентте заңсыз интернет-казино ұйымдастырған адам ұсталды
ШЫМКЕНТ. ҚазАқпарат - «Фаворит» букмекерлік кеңсесінің әкімшісі заңсыз интернет-казино ұйымдастырған. Бұл туралы ҚазАқпарат ҚР ҚМ Қаржы мониторингі комитетінің баспасөз қызметіне сілтеме жасап хабарлайды.
Аталған Комитет Шымкент қаласы бойынша Экономикалық тергеу департаменті «Фаворит» букмекерлік кеңсесінің бұрынғы әкімшісі Ю.Стебуновқа қатысты сотқа дейінгі тергеуді аяқтады.
«Ю.Стебунов «Букмекерская контора «Фаворит» ЖШС-нің әкімшісі қызметінде «Fin Bet» сауда маркасын қолдана отыра, серіктестікпен бұрын жалға алынған үй-жайларға қолжетімділікті пайдаланып, букмекерлік қызметтерді ұсынумен қатар заңсыз электронды казино ұйымдастырды.Сонымен қоса, ол ойыншыларға «FLG» бағдарламалық қосымшасын қолдана отырып, онлайн режимде ғаламтор арқылы ұтысты қамтамасыз ететін аппараттық-бағдарламалық кешен көмегімен қолдан жасалған және анимациялық ойындарға қолжетімділікті қамтамасыз еткен», - делінген хабарламада.
Шымкент қаласы Абай аудандық сотының үкімімен Ю.Стебунов ҚР ҚК 307-бабы 1-бөлігіне сәйкес ( заңсыз ойын бизнесін ұйымдастыру ) кінәлі деп танылды. Аталған қылмыстық әрекетке 300 АЕК (757 500 теңге) көлемінде айыппұл төлеу жазасы қарастырылған.
Тергеу амалдары барысында заттай айғақтар – 108 дана монитор және процессор, флэш-карталар, модемдер, сондай-ақ, 586 600 теңге ақша қаражаты тәркіленді.
