Шымкентте жасөспірімдерге қатысты 1,4 мыңға жуық құқық бұзушылық анықталды
ШЫМКЕНТ. ҚазАқпарат - Шымкентте жыл басынан бері жасөспірімдердің қатысуымен 1,4 мыңға жуық әкімшілік құқық бұзушылық анықталды, деп хабарлайды ҚазАқпарат.
Шымкент қалалық полиция департаменті қызметкерлері атқарған іс-шаралар нәтижесінде, осы жылдың 6 айында кәмелет жасына толмағандарға қатысты 1392 әкімшілік құқық бұзушылық белгілі болды.
«Оның ішінде, 32 жасөспірім ойын-сауық мекемесінде болған, 897 бала 23:00-ден кейін заңды өкілінсіз тұрғын жайдан тыс жерлерде жүрген. ӘҚБтК-тің 442-бабының 1-бөлігі (Кәмелетке толмағандардың түнгі уақытта заңды өкілдерінің еріп жүруінсіз сағат 22:00-ден таңғы 6-ға дейін ойын-сауық мекемелерінде болуы) бойынша 29 ата-анаға әкімшілік шара қолданылды. Сондай-ақ, мекеме иелеріне ӘҚБтК-тің 132-бабымен 20 хаттама толтырылды», - деп мәлімдеді ведомстводан.
Айта кетейік, құқық бұзушылық жасағаны үшін 6 жасөспірім және ата-аналық міндеттерін дұрыс орындамағаны үшін 4 жайсыз отбасы есепке алынды. Қазіргі таңда бұл бағыттағы жедел-профилактикалық шаралар жалғасын табуда.
