Шымкенттегі 4 аурухана жанына оттегі станциялары орнатылады
ШЫМКЕНТ. ҚазАқпарат – Шымкенттегі төрт аурухананың базасында оттегі станциясы орнатылатын болды. Бұл туралы қала әкімінің бірінші орынбасары Ербол Садыр мәлім етті, деп хабарлайды ҚазАқпарат тілшісі.
Ербол Садырдың айтуынша, аталған станциялар қалалық перзентхана мен жұқпалы ауруханада, №1 қалалық және №2 көпсалалы ауруханада орнатылмақ. Аталған әр медициналық мекемеде кислородтық 50 төсек-орын ашылады.
Қала әкімінің бірінші орынбасары бұдан бөлек, оттегі өндіретін тағы бір цех іске қосылатынын атап өтті. Онда күніне 1000-2000 дана оттегі баллоны шығарылмақ.
Сонымен қатар ол оттегі өндіретін қаладағы ірі 3 станцияның жұмысы тұрақты бақылауда екенін айтты.
«Жалпы қалада 722 кислородтық төсек-орын бар. Ал, қала аумағындағы барлық 24 ауруханада бір күнде 1200 кислородты баллон қажеттілігі туындап отыр»,- деді Ербол Садыр.
