ШЫҰ аясында ынтымақтастықтың экономикалық векторы белсенді дамуда - Ерболат Досаев
АСТАНА. ҚазАқпарат - ШЫҰ мемлекеттерінің экономика министрлері көтерген өзекті мәселелер үкімет басшыларының қарауына ұсынылады. Бұл туралы бүгін Астанада сыртқы экономикалық және сауда мәселелеріне жауап беретін ШЫҰ-ға мүше мемлекеттер министрлері кеңесінде ҚР Ұлттық экономика министрі Ерболат Досаев мәлім етті.
«12 жылда Шанхай ынтымақтастық ұйымы ықпалды халықаралық институтқа айналды. Бүгінде ШЫҰ өңірде тұрақтылық пен қауіпсіздікті қамтамасыз етуде, жалпы қатерлерге іс-қимыл жасауда, сондай-ақ әлемге және қауіпсіздікке қауіп тудыратын ахуалдарды реттеуде бірлескен қадамдарды әзірлеуде пәрменді тетік болып табылады. Сонымен қатар ШЫҰ аясында ынтымақтастықтың экономикалық векторы белсенді дамуда», - деді министр.
Е. Досаев өз сөзінде бүгінгі кездесу Астанада 14-15 желтоқсанға жоспарланған ШЫҰ-ға мүше мемлекеттер үкімет басшылары кеңесі отырысы қарсаңында өтіп жатқандығын айта келе: «Бүгінгі Министрлер кеңесінің қорытындысы ұйым аясында сауда-экономикалық ынтымақтастықты дамытудың өзекті мәселелерін талқылау кезінде біздің елдердің үкімет басшыларына ұсынылатын болады»,-деді.
Айта кетейік, отырыс барысында ШЫҰ аясында түрлі бағыттардағы өзара іс-қимылдың әлеуетін бұдан ары қарай нығайтудың ұсыныстары қаралатын болады.
