СІМ Бакуде апатқа ұшыраған кеменің Қазақстанға тиесілі екендігін теріске шығарады

Бұл туралы СІМ ресми өкілі Алтай Әбибуллаев хабарлады.

«Бірқатар отандық және шетелдік БАҚ-та дәйексіз әрі бұрмаланған ақпараттың жариялануына байланысты мынаны хабарлаймыз: Бакудегі Қазақстан Елшілігінен алынған ақпаратқа сәйкес, Әзірбайжанның Мемлекеттік теңіз басқармасы 2012 жылғы 16 ақпанда Бакудың Хатаин ауданы аумағындағы «Зых» портында жарылған «Сана» балықшылар кемесі қазақстандық емес. Сондай-ақ жарылыстың салдарынан жапа шеккендер мен қаза болғандар арасында да Қазақстанның азаматтары жоқ», - делінген ресми өкіл А. Әбибуллаев таратқан ақпаратта.

Тоқтала кететін жайт, алдын ала мәліметтер бойынша Бакудегі кеме жарылысы электрмен дәнекерлеу барысында орын алған көрінеді. Әзірбайжанның құзырлы органдары оқиға орнында тергеу жүргізуде.