Синоптиктердің 16 ақпанға арналған ауа райы болжамы
АСТАНА. ҚазАқпарат - Атмосфералық фронттардың өтуіне байланысты 16 ақпан күні Қазақстанның басым бөлігінде құбылмалы ауа райы күтіледі, кей жерлерде қар жауып, жел күшейеді. Жекелеген өңірлерде бұрқасын, тұман күтіледі. Оңтүстікте, оңтүстік-шығыста және орталықта көктайғақ болжанады, деп хабарлайды ҚазАқпарат «Қазгидромет» РМК-ға сілтеме жасап.
Атап айтқандай, Жамбыл облысының кей жерлерінде тұман, көктайғақ, 15-20 м/с екпіндегі жел күтіледі.
Солтүстік Қазақстан, Шығыс Қазақстан облыстарының кей жерлерінде бұрқасын, тұман болып, жел 15-20 м/с күшейеді.
Павлодар облысының кей жерлерінде түнде 18 м/с екпіндегі жел мен жаяу бұрқасын соғады.
Оңтүстік Қазақстан, Қарағанды облыстарының кей жерлерінде тұман мен көктайғақ болуы ықтимал.
Павлодар облысының жекелеген аумақтарында желдің күші 15-20 м/с артады, күндіз көктайғақ күтіледі.
Ақмола, Қостанай облыстарының кей жерлерінде жаяу бұрқасын, Қостанай облысында тұман күтіледі.
Қызылорда, Маңғыстау, Батыс Қазақстан, Ақтөбе облыстарының кей жерлерінде тұман болжанады.
