Сирия процесі: Астанаға қай елдің делегаттары келеді

АСТАНА. ҚазАқпарат – Ертең елордада Астана форматында Сирия бойынша 19-шы халықаралық кездесулер басталады. Бұл туралы Сыртқы істер министрлігінің ресми өкілі Айбек Смадияров мәлім етті, деп хабарлайды ҚазАқпарат тілшісі.

Айбек Смадияровтың дерегінше, келіссөздерге Ресей, Түркия, Иран, Сирия Үкіметі мен Сирия оппозициясының делегациялары қатысады. Бақылаушылар ретінде БҰҰ, Иордания, Ливан және Ирак өкілдері келеді.

«22-23 қарашада Астана қаласында Сирия бойынша Астана форматында кезекті 19-шы халықаралық кездесу өтеді. Келіссөздерде Ресей делегациясын – Ресей Федерациясы Президентінің Сирияны реттеу жөніндегі арнайы өкілі Александр Лаврентьев, Түркия делегациясын – Сыртқы істер министрлігінің Бас директоры Унал Сельчук, Иран делагациясын – Сыртқы істер министрінің аға көмекшісі Хаджи Али Асгар, Сирия Үкіметінің делегациясын – Сыртқы істер министрінің орынбасары Мухаммед Айман Сусан, Сирия оппозициясының делегациясын Ахмад Тома басқарады», - деп мәлім етті Айбек Смадияров.

Еске салайық, бұған дейін Сирия процесінде қандай мәселелер тақыланатынын хабарлап едік.