Сирияның тұтас бір буыны жоғалуы мүмкін
«Біз тағы бір жыл бойы соғысқа жол беріп қойып, қарап отырмауымыз керек. Олай ететін болсақ, соғыстан көз ашпаған, зорлық-зомбылықты ғана білетін ұрпақ өсіп-жетілетін болады», - деп мәлімдеді аталмыш қордың өкілі Патрик МакКормик (Patrick McCormick).
muslim.kz сайтының мәліметіне қарағанда, көмекке аса мұқтаж төрт миллион сириялықтың жартысына жуығы кәмелет жасына толмаған. Олардың 536 мыңы - әлі буыны бекіп, бұғанасы қатпаған бес жасқа дейінгі балалар.
Сириялық босқындардың тең жарымын балалар құрап отыр. Бұл жайында IINA ақпарат таратты.
Осындай мәліметтерді алға тартқан БҰҰ-ның Балалар қоры сириялық балалардың тағдырына алаңдайтынын білдірді.
Халықаралық Save the Children қайырымдылық ұйымы баррикаданың екі жағында да балалардың барын жеткізді.
Олар ақпарат жеткізіп, жүк тиейді, күзетеді. Кейде ұрысқа аралысып, ересектер оларды қалқан етеді. Бұған қоса, балаларды зорлау, азаптау, тұтқындау оқиғалары да орын алған.
Жараланып, кемтар болып қалған балалар да көптеп кездеседі.