СҚО-да 5 жылда 14 млрд теңгеге екі мыңнан астам медициналық қондырғы алынды
ПЕТРОПАВЛ. ҚазАқпарат – Солтүстік Қазақстан облысындағы балалар ауруханасында бүгін заманауи компьютерлік томограф іске қосылды, деп хабарлайды ҚазАқпарат тілшісі.
СҚО әкімі Құмар Ақсақалов балалар ауруханасында болып, жаңа қондырғының жұмысын көрді.
«Осыдан бірнеше жыл бұрын тұрғындар компьютерлік томографияның жетіспейтінін, ұзын-сонар кезек мәселесін көтерген болатын. Біз бұл мәселені біртіндеп шешіп келеміз. 2017 жылдан бастап томографтардың саны 4-тен 8-ге дейін ұлғайтылды.
Бүгін балалар ауруханасында жаңа компьютерлік томография іске қосылды. Жуырда Петропавл қалалық көпсалалы ауруханада тағы бір КТ кабинеті ашылады. Қолданыстағы аппараттарды 1-ші қалалық аурухана мен Мүсірепов аудандық ауруханасына жібердік», - деді Құмар Ақсақалов.
Өңір басшысының айтуынша, соңғы бес жыл бойы өңірдің емдеу мекемелері заманауи медициналық жабдықтармен толығып жатыр. Осы аралықта бұл мақсатқа 14 млрд теңге бөлінді. 2 мыңнан астам қондырғы алынды.
«Ангиограф, маммограф, УЗИ, рентген аппараттарының тапшылығы мәселесі облыста толығымен шешілді. Ауруханалар мен емханаларды стандарт бойынша жабдықтауға бізге 4 УЗИ аппараты керек еді. Өткен жылы эксперт класты 11 УЗИ аппараты сатып алынып, мәселе шешілді», - деді СҚО әкімі.
