СҚО-да биыл 8 сүт-тауар фермасы пайдалануға берілмек
ПЕТРОПАВЛ. KAZINFORM — Солтүстік Қазақстан облысына Германия мен Дания корольдігінен асыл тұқымды ірі қара мал жеткізілді. Сауын сиырлар жаңадан ашылған сүт-тауарлы фермаларға алынып жатыр.
Асыл тұқымды ірі қара малдың алғашқы партиясы — 34 бас голштино-фриз сиыры СҚО Қызылжар ауданы «Молодое-агро» ЖШС жеткізілді. Қазір карантинде тұр.
Оған дейін шаруашылық Архангелка елді мекенінің маңында салынып жатқан сүт-тауарлы фермасының құрылысын аяқтап, пайдалануға бермек.
Жаңа ферма 200 бас ірі қара малға шақталған.
«Сүт-тауарлы фермалардың ауылдарда ашылуы әлеуметтік-экономикалық серпін береді. Бұл жобаның іске қосылуымен 20 адам тұрақты жұмысқа алынбақ. Голштино-фриз тұқымы сүтті, тез жерсінеді. Инвестициялық жоба аясында тағы 150 сиыр сатып әкелінеді. Нәтижесінде жылына 1200 тонна сүт алынбақ», — дейді Қызылжар ауданы әкімінің орынбасары Дәурен Шақанов.
Осындай асыл тұқымды мал бірер күн бұрын Дания корольдігінен Шал ақын ауданындағы «LTD Zha-Group» сүт-тауарлы фермасына жеткізілді.
136 бас мал шілдеге дейін карантинде болмақ. Өйткені нысан осы уақытта пайдалануға беріледі.
«СҚО — сүт-тауарлы фермаларды салудан ел бойынша көшбасшы. Соңғы 6 жылда 36 осындай ферма салынды. Биыл тағы 8-і пайдалануға беріледі. Бұл сүт өндіруді арттырып, жаңа жұмыс орындарымен қамтамасыз етеді», — дейді СҚО ауыл шаруашылығы және жер қатынастары басқармасының басшысы Мейрам Меңдібаев.
Ауыл шаруашылығы ведомствосының мәліметінше, соңғы үш жылда өңірдің сүт өндіру кәсіпорындары жылдық қуатын 388,8 мың тоннадан 451,3 мың тоннаға, яғни шамамен 14% арттырды.
