СҚО-да бір аптаның ішінде 500-ден астам адам ЖРВИ жұқтырған

ПЕТРОПАВЛ. ҚазАқпарат - Санитарлық дәрігерлер Солтүстік Қазақстан облысындағы тұмау және ЖРВИ жұқтыру бойынша эпидемиологиялық жағдай қандай екенін айтты, деп хабарлайды ҚазАқпарат тілшісі.

Қоғамдық денсаулық сақтау департаменті бөлім меңгерішісі Фарида Мұхамеджанова соңғы аптада облыста 583 ЖРВИ жұқтыру жағдайы тіркелгенін хабарлады. Науқастану көрсеткіші 100 мың тұрғынға шаққандағы межелік деңгейден 2 есе аз. Науқастанғандардың 97 пайызы - Петропавл тұрғындары.

«Ұлттық сараптама орталығының жұқпалы аурулар зертханасы тұмаудың 5 жағдайын растады: оның бірі - «В» түрі болса, төртеуі - «А/Н1N1pdm-09» маусымдық түрі. Сондай-ақ, облыс аумағында басқа да витрустық инфекциялар таралған: 1, 3, 4 түріндегі парагрипп, риносинцитиалдық вирус, метапневмовирус, риновирус, бокавирус, аденовирус, коронавирус», - деді Ф. Мұхамеджанова.

Өңірде эпидемиологиялық маусым басталғалы бері 12 мың ЖРВИ жағдайы тіркелген. Оның басым бөлігі - 14 жасқа дейінгі балалар. Департаментте атап өткендей, ЖРВИ-мен жаппай науқастанған оқушылар тіркелмеген. Білім беру мекемелерінде оқу процесі тоқтатылған жоқ.