СҚО-да биыл «Аңсаған сәби» бағдарламасы аясында 40 сәби өмірге келді

ПЕТРОПАВЛ. ҚазАқпарат – Солтүстік Қазақстан облысында биыл «Аңсаған сәби» бағдарламасы бойынша 210 квота бөлінді. Жыл басынан оны 90-ға жуық отбасы пайдаланса, 40 сәби өмірге келіп, шаңырақты қуанышқа бөледі, деп хабарлайды ҚазАқпарат тілшісі.

СҚО денсаулық сақтау басқармасы баспасөз қызметінің мәліметінше, «Аңсаған сәби» бағдарламасы бойынша жыл басынан 40 нәресте өмірге келді. Сәби сүйгендердің бірі – петропавлдық Евгения Катина. 35 жастағы келіншек 15 жыл бойы балалы болуды армандаған екен.

«Ұлды болдым, қуанышымды айтып жеткізе алмаймын. Бақыттымын. Ұлымның салмағы 3 келіге жақын», - дейді жас ана Евгения Катина.

Былтыр солтүстікқазақстандықтар «Аңсаған сәби» бағдарламасы аясында бөлінген 217 квотаның 90 %-дан астамын пайдаланған. Өңірге биыл ЭКО процедурасын тегін жүргізуге 210 квота берілген. Оны 90-ға жуық отбасы пайдаланды.

Мамандардың айтуынша, көмекті негізінен 30 - 35 жас аралығындағы келіншектер алған. Ал жыл басынан бері СҚО-да жасанды ұрықтандырудың нәтижесінде 40 сәби дүниеге келді.

Бүгін, Халықаралық балаларды қорғау күні облыстық перинаталдық орталықта 11 шақалақ туды. Олардың алтауы ер бала болса, бесеуі – қыз. Бүгін тағы толғағы қысқан үш әйел босанып, баласын бауырына алмақ. Мерекеге орай жас аналардың бәріне бала күтіміне қажет болатын сыйлықтар берілді.

Ашық көздерден алынған фото