СҚО-да биыл мас жүргізушілердің кінәсінен 5 адам қаза тапты
ПЕТРОПАВЛ. ҚазАқпарат – Солтүстік Қазақстан облысында жыл басынан бері мыңға жуық мас жүргізушісі ұсталып, көлік жүргізу құқығынан айырылды, деп хабарлайды ҚазАқпарат тілшісі.
СҚО полиция департаменті баспасөз қызметінің мәліметінше, өңірде жыл басынан бері мас жүргізушілердің кінәсінен 16 жол-көлік оқиғасы тіркеліп, салдарынан 5 адам қаза тапты, 16-сы жарақаттанды.
«Мас күйде көлік басқару жағдайларына жол бермеу – жол қауіпсіздігін нығайтудағы маңызды міндеттердің бірі. Мұндай фактілер жүргізушілер тәртібін арттыруға бағытталған рейдтік және жедел-профилактикалық іс-шаралар барысында анықталады.
Естеріңізге саламыз: мас күйде көлік тізгіндегені үшін 15 тәулікке әкімшілік қамауға алу және 7 жылға көлік басқару құқығынан айыру жазасы қарастырылған. Мас күйде көлік жүргізу – барлық жол қозғалысына қатысушылардың денсаулықтары мен өмірлері үшін аса қауіпті. Аталған фактілерге жол бермеуге бағытталған жұмыстар ұдайы жүргізілуде», - дейді СҚО ПД Жергілікті полиция қызметі басқармасының бастығы Айдын Байматов.
Мәселен, облыста өткен бір апталық «Мас жүргізуші» жедел-профилактикалық іс-шарасы барысында ішімдік ішіп рульге отырған 38 адам ұсталды.
Ал жыл басынан бері облыста жол қауіпсіздігі бойынша 9 жедел-профилактикалық іс-шара ұйымдастырылды, нәтижесінде 981 мас жүргізуші жауапкершілікке тартылды.
