СҚО-да экологиялық акция аясында 306 тонна қоқыс жиналды
ПЕТРОПАВЛ. ҚазАқпарат – Солтүстік Қазақстан облысында экологиялық сенбілік өтіп, екі мыңнан астам адам 306 тонна қоқыс жинады, деп хабарлайды ҚазАқпарат тілшісі.
СҚО бойынша Экология департаментінің мәліметінше, сенбілік «World cleanup day 2022» халықаралық дәстүрлі акциясы аясында өтті. Оған жыл сайын 180-нен астам ел, кемінде 18 млн адам қатысады. СҚО-да іс-шара «Birge Taza Qazaqstan» атауымен ұйымдастырылды. Оған департаменттің мамандары, аймақтың атқарушы органдардың, кәсіпорындардың өкілдері, экобелсенділер қатысты.
«Жыл сайын осы акциядан шет қалмаймыз. Бұл өте керек іс-шара. Биыл Петропавлда экосенбілік барысында 5 аумақты қамтыдық. Олардың ішінде Пестрое көлінің жағалауы, орталық саябақ және «Жеңіс» саябағы бар. Аудандар да бұл жұмыстан шет қалмады. Мақсатымыз - қыстың алдында жағалауларды, саябақтар мен скверлерді қоқыстан тазарту. Жиналған қоқысты сұрыптап, қайта өңдеуге жөнелтеміз», - дейді СҚО бойынша Экология департаментінің басшысы Азамат Бектасов.
Бұл жолы сенбілікке 2 мыңнан астам адам қатысты. Нәтижелі жұмыс істеуге ауа райы да қолайлы болды. Іс-шара барысында 306 тонна қоқыс жиналды. Оның ішінде 26,2 тонна шыны, 15,8 тонна пластик, 14,55 тонна резеңке, 18,95 тонна қағаз, 44,5 тонна металл. Қайта өңделетін қалдықтар кәсіпорынға қайта өңдеуге жіберілді.
