СҚО-да қауіпті індет белгілерімен ауруханаға жатқызылғандар саны бір аптада 32% артты
СҚО Тауарлар мен көрсетілетін қызметтердің сапасын бақылау департаментінің басшысы Серікбай Қасмақасов онлайн брифинг өткізіп, COVID-19 қатысты өңірдегі жағдаймен таныстырды.
Облыстың бас санитариялық дәрігерінің мәліметінше, СҚО-да қауіпті індетті жұқтырудың 315 жағдайы тіркелсе, соның 146-сында науқастар дәрігерге ауырған соң қаралған. 169-ында ауру белгілері байқалмаса, 111 жағдайда сырқаттар сырттан келді. Сондай-ақ 38 баланың вирусты жұқтырғаны расталды.
Өңірде тек соңғы тәулікте COVID-19 24 адамда анықталса, оның тең жартысында коронавирус инфекциясының ауру белгілері болған.
«Қазіргі таңда стационарларда 97 адам ем алып жатыр. Олардың 68-інің жағдайы қанағаттанарлық болса, 26-сының жағдайы – орташа, үшеуі ауыр халде жатыр. Өздігінен дем ала алмағандықтан бұл науқастар өкпені жасанды желдету аппаратына қосылған. Бұдан басқа 157 адам үйден бақыланады. Тәуір болып шыққандардың саны 61-ден асты», - дейді Серікбай Қасмақасов.
СҚО-да қауіпті індет Жамбыл ауданын есептемегенде Петропавл қаласы мен өңірдің 12 ауданында тіркелді. Ауырғандардың 56% облыс орталығына тиесілі болса, екінші-үшінші орындарда М.Жұмабаев және Мамлют аудандары келеді. Бұл аудандарда ауру негізінен сырттан келгендерден анықталды.