СҚО-да көктем ерте келіп, өрт шығу жағдайы көбейді

ПЕТРОПАВЛ. KAZINFORM – Cолтүстік Қазақстан облысында өрт қауіпті кезең 14 сәуірде басталады. Алайда қазірдің өзінде дала өрті жиілеген.

СҚО Төтенше жағдайлар департаменті мемлекеттік өртті бақылау басқармасының бастығы Аслан Ахметжановтың айтуынша, кепкен шөптің жану фактісі 25 наурыздан бастап тіркеле бастады. Былтыр алғашқы осындай өрт 18 сәуірде шыққан.

- Тайынша ауданында 14 өрт, Петропавлда 2, Айыртау, М.Жұмабаев және Жамбыл аудандарында бір жағдайдан тіркелді. Жалпы өртенген аумақ 30 га алып жатыр. Тұрғындардың бейғамдығы өрттің шығуына себеп болған. Қазір қыстан қалған қоқысты, кепкен шөпті жинап, күйдіру басталады. Сондықтан қарапайым ережелерді ұмытпау керек. Қалдықтарды ғимараттар мен құрылыстардан 50 метр қашықта жағу керек. Ол үнемі бір адамның бақылауында болғаны жөн, - дейді Аслан Ахметжанов.

Маман өрт қауіпті кезеңде ауыл шаруашылығы алқаптарында, жайылымдық жерлерде оның кімнің меншігінде болғанына қарамастан құрғақ шөпті жағуға тыйым салынғанын ескертті.

Қамыс пен құрғақ шөпті шаруашылық және өндірістік қажеттілік болған жайдайда, өрттің пайда болу қаупін азайту мақсатында ғана шабуға болады.

- Шаруашылықтардың басшылары, жеке тұлғалар, кәсіпкерлер мен орман иеленушілер ауыл шаруашылығы және жайылымдық алқаптарда шөптерді, сабанды, сондай-ақ орманды дала алқаптарының аумақтарында ағаш бұтақтарын күйдіруді өрт қауіпті кезең басталғанға дейін немесе аяқталғаннан кейін ғана өрт қауіпсіздігі шараларын сақтап жүргізе алады, - дейді Аслан Ахметжанов.

Бұған дейін Алматыда 6 қабатты әкімшілік ғимараты өртенгенін жаздық.