СҚО-да колледж студенті «Жабайы жануарларды азықтандыр» атты челлендж бастады
ПЕТРОПАВЛ. KAZINFORM – Солтүстік Қазақстан облысының 16 жастағы тұрғыны Станислав Гвоздев ашыққан жабайы жануарларды қоректендіріп жүр. Бұл бастаманы жасөспірім оқитын оқу орны да қолдап, «Жабайы жануарларды азықтандыр» атты челленджге қатысып жатыр.
Станислав Гвоздев СҚО Қызылжар ауданы Рассвет елді мекенінің тұрғыны. Қазір Петропавлдың Борки кентінде орналасқан Солтүстік Қазақстан кәсіби-педагогикалық жоғары колледжінің 1-курсында оқиды. Болашақ мамандығы көлік жөндеумен байланысты.
«Үйге демалыста жиі барам. Жол бойында ашыққан еліктер жиі ұшырасады. Оларға қалың қардан азық тауып жеу қиын. Кейбірі, ашыққаннан әлсіреген. Сондықтан жануарлар көктемге аман-есен жетуі үшін азықтандыру керек деп шештім», - дейді Станислав Гвоздев.
Ұлының бастамасына әкесі қолдау көрсеткен. Олар жеңіл көлікке шөп артып алып, еліктер жүретін жерлерге шөп салынған қаптарды тастап, жем шашып кетеді.
«Ата-анам ауылда мал ұстайды. Жаз бойы біз әкеммен бірге малға жем-шөп дайындаймыз. Жабайы жануарларға беріп жатқан шөп – осы жазда дайындаған қорымыз. Әр демалыс сайын ауылға жақын орманға қарда жүргіш көлікпен барып, шөп-жем тастап кететінмін. Бірақ алдыгүні техникам сынып қалды. Сондықтан шөпті жол бойына тастауға тура келді. Маған бұл істе ата-анам көмектеседі», - дейді Станислав Гвоздев.
Студенттерінің «Жабайы жануарларды азықтандыр» атты челлендж бастағанын білген оқу орны енді оған қолдау көрсетпек. Ертең колледждің ұстаздары мен студенттері орманға барып, жабайы жануарларға азық қалдырмақ.
