СҚО-да өткен тәулікте 13 ауданның тек төртеуінен ғана коронавирус анықталды
ПЕТРОПАВЛ. ҚазАқпарат – Солтүстік Қазақстан облысында соңғы екі ай бойы өршіген коронавирус саябырсып, күнделікті инфекцияны жұқтыратындар саны еселеп азайды, деп хабарлайды ҚазАқпарат тілшісі.
СҚО денсаулық сақтау басқармасы баспасөз қызметінің мәліметінше, өңірде өткен тәулікте 185 адам ПТР-тест тапсырса, соның тек 50-інде коронавирус расталды. Бұл соңғы бірнеше айдан бергі өңірдегі ең төмен көрсеткіш. Қауіпті инфекцияны жұқтырғандардың 37-сі – Петропавл тұрғыны, 13 ауданның тек төртеуінде ғана сырқаттанғандар анықталды. Соның ішінде 6 адам Тайынша ауданында, М.Жұмабаев ауданында 1 адам, Қызылжар ауданында 4 адам және Ақжар ауданында 2 адам ауырған.
Қазіргі уақытта облыстың инфекциялық стационарларында 306 науқас ем алып жатыр, емдеу мекемелері 18 %-ға ғана жүктелген. Жансақтау бөлімшесінде 34 адам жатыр. Өткен тәулікте 1 адам қайтыс болды. Жалпы індет басталғалы СҚО-да 416 адам көз жұмды. Ал КВИ-ды жұқтырғандар саны 34 331 болса, 30 587 адам тәуір болып шықты.
