СҚО-да пара алу үстінде Жер кадастры департаментінің басшысы ұсталды
АСТАНА. ҚазАқпарат - Сыбайлас жемқорлыққа қарсы іс-қимыл ұлттық бюросының Солтүстік Қазақстан облысы бойынша департаменті облыстық «Үкімет азаматтар үшін» Мемлекеттік корпорациясы Жер кадастры және жылжымайтын мүлікті техникалық тексеру департаментінің басшысы Е.Абдрахмановты ұстады.
Абдрахманов Е. қол астындағы қызметкерлердің бірін жұмыстан шығарамын деп қорқытса, біріне қызмет бабы бойынша қамқорлық көрсететінін айтып, олардан жүйелі түрде ақша қаражатын алып келген.
Өзінің қылмыстық әрекеттерімен Абдрахманов Е. заңсыз түрде 1 500 000 теңге алғаны белгілі болды. Ол 250 000 теңге сомасындағы кезекті парасын алу үстінде қолға түсті.
Қазіргі уақытта лауазымды тұлға Петропавл қаласындағы уақытша ұстау абақтысына қамалды. Сотқа дейінгі тергеу жүріп жатыр.
