СҚО-да референдумда 600-ге жуық учаске жұмыс істейді

ПЕТРОПАВЛ. KAZINFORM – 6 қазан күні өтетін жалпыұлттық референдумда Солтүстік Қазақстан облысынан 375 236 адам құқығын пайдаланып, дауыс бере алады. Қазір өңірде дайындық жұмысы жүріп жатыр.

Атом электр станциясын салуға қатысты референдумның өтуіне санаулы күн қалды. СҚО референдум комиссиясының мәліметінше, 15 қыркүйек күні өңірде учаскелер ашылды, олар науқанды өткізуге дайын. Облыс бойынша референдум учаскелерінің саны - 591, соның ішінде 97-сі Петропавлда орналасқан. Сондай-ақ уақытша болу орындарында 13 учаске ашылған.

Референдумда 606 комиссия жұмыс істемек. Оның 15-і аумақтық, қалғаны учаскелік комиссиялар. Аумақтық комиссиялардың 105, ал учаскелік комиссиялардың 3325 мүшесі бар.

«Референдум 6 қазан күні таңғы сағат 7.00-де басталып, кешкі 20.00-ге дейін жалғасады. Дауыс берушілер «иә, келісемін» немесе «жоқ, келіспеймін» деген екі нұсқаның біреуін таңдайды. Келе алмайтындарға үйлеріне жәшік апарылады. Сондай-ақ мүгедектігі бар адамдардың құқығы бұзылмауын да ескереміз», - дейді СҚО референдум комиссиясының мүшесі Сағындық Рахымжан.

Бұған дейін 2025 жылдан бастап облыс орталықтарының әкімдері сайланатынын жазған едік.