СҚО-да жемқор 14 педагог жауапкершілікке тартылды
АСТАНА. ҚазАқпарат - Солтүстік Қазақстанда жыл басынан облыстағы 14 жалпы білім беретін және орта кәсіби білім беретін мекеме директоры тәртіптік жауапкершілікке тартылды.
Үшеуіне қатысты қылмыстық іс қозғалды. Бұл туралы «Нұр Отан» партиясының облыстық филиалы жанындағы жемқорлыққа қарсы күрес бойынша қоғамдық кеңес отырысында айтылды.
"Өрескел заң бұзушылыққа барған 2 колледж директорының үстінен 3 қылмыстық іс қозғалды. Мәселен, Петропавл қаласы прокуратурасының ағымдағы жылы 5 наурызда жүргізген тексеруінің нәтижесі бойынша құрылыс колледжі директорына қатысты қылмыстық іс қозғалды. Өз қызметін асыра пайдаланған ол 500 мың теңге көлеміндегі бюджеттік қаражатты қалтасына басқан. Жемқор директор шартты түрде 5 жылға сотталды", - деп хабарлады СҚО прокуратурасының әлеуметтік-экономикалық саладағы заңдылықты бақылау бойынша басқарма басшысының м.а. Арман Кұсанов.
2014 жылы жалақыны заңсыз төлеудің 6 фактісі тіркелді.
Мемлекетке келтірілген залал аймақ бойынша 1,5 млрд. теңгені, ал осы жылдың басынан 200 млн. теңгені құрады.
