Солтүстік Қазақстанда ҰБТ-ға телефон кіргізген 5 түлектің тест нәтижесі жойылды
ПЕТРОПАВЛ. ҚазАқпарат – Солтүстік Қазақстан облысында бес түлек Ұлттық бірыңғай тестілеу талабын бұзғаны үшін сынақтан шеттетілсе, тағы екеуі дене қызуы көтерілгендіктен тестілеуден өте алмады, деп хабарлайды ҚазАқпарат тілшісі.
Бүгін СҚО білім басқармасы басшысы Гүлмира Кәрімова онлайн брифинг өткізіп, өңірде ҰБТ-ның барысымен таныстырды.
Биыл облыс бойынша 2910 адам ҰБТ-ға қатысуға ниет білдірген. Оның 2478-і биылғы мектеп түлектері. Өткен жылмен салыстырғанда тестілеуге қатысуға тілек білдірушілердің саны 15,7% артқан.
Төрт күннің қорытындысы бойынша 834 адам тестілеуден өтті. Олардың ҰБТ тапсыру сәтін онлайн бақылауға мүмкіндік болды.
Қазіргі таңда ең жоғары – 128 балл Тимирязев ауданындағы Мичурино орта мектебінің түлегі Даяна Василюкке тиесілі. Жалпы 29 мектеп бітіруші 100-ден жоғары балл алды.
«Ұялы телефон қолданғандары үшін аудиториядан 5 түлек шығарылып, акт толтырылды және олардың тест нәтижесі жойылды. Олар Ғ.Мүсірепов ауданының – 2, Тимирязев ауданының – 2 және Петропавлдағы Әбу Досмұхамбетов атындағы мамандандырылған мектеп-интернатының бір түлегі. Тағы екі бала дене қызуының жоғарылауына байланысты тестілеуге жіберілмеді», - дейді Гүлмира Кәрімова.
