Солтүстік Корея Жапон теңізіне қарай баллистикалық зымыран ұшырғанын растады
АСТАНА. KAZINFORM – Солтүстік Корея 31 қазан, бейсенбі күні Жапон (Шығыс) теңізіне қарай құрлықаралық баллистикалық зымыран ұшырғанын растады, деп хабарлайды Корея Орталық телеграф агенттігі.
Агенттіктің хабарлауынша, КХДР Қорғаныс министрлігі өкілінің мәлімдемесіне сәйкес 31 қазан күні таңертең құрлықаралық баллистикалық зымыран сынағын өткізді.
«Бүгін КХДР зымыран техникасы бас басқармасы өте маңызды сынақ өткізді. КХДР басшысының бұйрығымен жүзеге асырылған сынақ ұшыру КХДР-ның стратегиялық зымырандық әлеуеті туралы соңғы мәліметтерді жаңартып, оның әлемдегі ең қуатты стратегиялық тежеу құралының заманға сай және сенім екенін көрсетті», - деп жазды агенттік.
«Сынақ ұшыру – бұл соңғы уақытта аймақтық жағдайды қасақана ушықтырған және біздің республикамыздың қауіпсіздігіне қатер төндіретін қарсыластарды жауап шараларын қабылдауға бел байлау туралы хабардар ету мақсатына толығымен сәйкес келетін тиісті әскери іс-қимыл», - деп келтірді агенттік Ким Чен Ынның сөздерін.
«Мен КХДР ешбір жағдайда ядролық қарулы күштерін нығайту бағытын өзгертпейтініне сендіремін», - деп қосты ол.
Өз кезегінде Оңтүстік Корея құрлықаралық баллистикалық зымырандар ұшыруына жауап ретінде Солтүстік Кореяға қарсы жаңа санкциялар енгізеді, деп жазды Yonhap агенттігі президент әкімшілігіне сілтеме жасап.
