Сот-сараптамалық орталығы 385 діни мазмұндағы материалға сараптама жүргізді
АСТАНА. ҚазАқпарат - Сот-сараптамалық орталығы 2014 жылы және 2015 жылдың І тоқсанында 385 діни мазмұндағы материалға сараптама жүргізді. Бұл туралы бүгін ҚР Әділет министрлігіне қарасты аталған орталықтың директоры Исидор Борчашвили мәлім етті.
«Соңғы жылдары біз жүргізген сараптамалар экстремизммен, діни лаңкестікпен байланысты қылмыстық заң бұзушылықтардың артып келе жатқанын көрсетті. Мәселен, 2014 жылы және 2015 жылдың І тоқсанында Әділет министрлігінің Сот сараптамалық орталығы 385 діни мазмұндағы материалдарға сараптама жүргізді», - деді ол.
Оның атап өтуінше, республика бойынша діни мазмұндағы сот сараптамасы тек 5 облыста ғана жүргізіледі. Бірақ, қазіргі уақытта Батыс Қазақстан облысындағы сарапшы өз еркімен жұмыстан шығып кеткен. Сондықтан да бұл өңірде сот-дінтанушылық сараптама жүргізу тоқтап тұр.
«Жоғарыда аталған мерзімде Оңтүстік Қазақстан облысында - 133, Астана қаласында - 115, Алматыда - 82, шығыс Қазақстан облысында - 29 және Батыс Қазақстан облысында - 26 діни мазмұндағы материалға сараптама жүргізілді», - деді И.Борчашвили.
