Спорт министрі ОАР-дан жеңіспен оралған каратэшілерді марапаттады (ФОТО)
АСТАНА. ҚазАқпарат - Бүгін Мәдениет және спорт министрі Арыстанбек Мұхамедиұлы жуырда Оңтүстік Африка Республикасының ең ірі қаласы Йоханнесбургте өткен әлемдік біріншілікте жеңіспен оралған каратэшілерді алғыс хаттармен марапаттады.
Жалпы, әлем біріншілігінің қорытындысы бойынша Қазақстан 17 алтын, 9 күміс және 2 қола медаль жеңіп алған.
«Оңтүстік Африка Республикасында өткен 17-ші әлем чмепионатынан биік жетістіктермен оралдыңыздар. Сіздер 17 алтын, 9 күміс және 2 қола медаль иеленіп, Қазақстанның көк байрағын 17 рет аспанға шарықтаттыңыздар, әнұранымызды 17 рет шырқадыңыздар. Каратэ - Қазақстанда қарқынды дамып келе жатқан спорт түрі. Сондықтан, сіздерге қарап біздің жастар бой түзейді, спорқа ден қойып, салауатты өмір салтын ұстанады», - деді өз құттықтауында министр.
Жоғарыда айтқанымыздай, Қазақстан құрамасы командалық жарыстарда және жекелеп өнер көрсету арқылы 17 алтын, 9 күміс, 2 қола жүлдеге ие болды. Бүгін министрі Астана қаласы бойынша Каратэ-до федерациясының құрметті президенті Марат Ахмеджановқа, Астана қаласы бойынша каратэ-до федерациясының президенті Мейрамгүл Дукуеваға, Астана қаласы бойынша федерациясының вице-президенті Виктор Ешкинға, жаттықтырушы Елена Склярова, Зафар Саидов, Сергей Волченколарға, сондай-ақ спортшылар - Қайсар Қуаныш, Сержан Жамбыршин, Еркежан Мүтәліп, Әділет Үсенбаев, Данил Зайка, Даниэл Кан, Рауан Тоғызбаевтарға алғыс хат табыстады.
