Стартаптар бәйгесінде қазақстандық қосымша 25 мың доллар жеңіп алды
АСТАНА. ҚазАқпарат - Қазақстандық «Wipon» атты мобильдік қосымша стартаптар бәйгесінде 25 мың доллар жеңіп алды. Байқау TechConnect Astana халықаралық технологиялық конференциясы аясында өтті.
Бұл додаға қатысқан 300-ден астам үміткерден 10 финалист іріктелді. 25 мың доллар көлеміндегі сыйақыны Cross Border Angels халықаралық инвесторлар жүйесі ұсынды. Wipon - жалған тауарларды пайдаланудан сақтайды және қауіпсіздікті қорғауға септігін тигізетін тұғырнама. Атап айтқанда, iOS-қосымшасы көмегімен Wipon тұтынушыларға тауардың түпнұсқалылығын анықтауға мүмкіндік береді. Мобильдік қосымша арқылы тұтынушы тауардың қаптамасындағы штрих-кодты немесе бірегей кодты сканерлеп, өнімнің түпнұсқалылығын анықтай алады. Тұғырнама авторлары Wipon еліміздегі көлеңкелі экономикамен күресуге елеулі пайдасын тигізетіндігін алға тартуда.
