Статистика агенттігі мүгедектерге қатысты әлеуметтік зерттеудің 2 жаңа әдісін енгізді
АСТАНА. ҚазАқпарат - ҚР Президентінің тапсырмаларын орындау барысында Статистика агенттігі әлеуметтік зерттеудің 2 жаңа әдісін енгізді. Бұл туралы бүгін Орталық коммуникациялар қызметінде өткен брифингте ҚР Статистика агенттігінің төрағасы Әлихан Смайылов мәлім етті.
Оның айтуынша, мүмкіндігі шектеулі жандарды жұмыспен қамту және олар үшін қолжетімді инфрақұрылымдар жасау жөніндегі Мемлекет басшысының тапсырмасын орындау аясында Статистика агенттігі 2014 жылы гендерлік ерекшелікті ескере отырып, ересектер мен балаларға арналған жеке зерттеудің 2 жаңа әдісін қолданысқа енгізді.
«Бұл зерттеудің нәтижесінде мүмкіндігі шектеулі жандардың қазіргі жағдайын көрсететін, түрлі проблемаларға тап болған адамдарды анықтауға мүмкіндік беретін және әлеуметтік саясаттың осы саласында шешімдер қабылдауға негіз болатын мәліметтер алынады», - деді Ә. Смайылов.
