Странджа кубогі – 2025: Үш қызымыз жеңіп, біреуі жеңілді

АСТАНА. KAZINFORM — Болгария астанасы Софияда өтіп жатқан дәстүрлі Странджа халықаралық турнирінің екінші күні төрт қазақстандық бұрымды боксшымыз шаршы алаңға шығып, үшеуі жеңіске жетсе, біреуі жарыс жолынан шығып қалды.

Нақтырақ айтсақ, бүгінгі «Странджа» турнирін күндізгі сессияда боксшы қыздар бастады. Ұлттық құрама сапында шаршы алаңға шыққан 4 боксшы қызымыздың үшеуі алғашқы жекпе-жектерін жеңіспен бастап, жарысты ары қарай жалғастыруға мүмкіндік алды. 

50 келіге дейінгі салмақта Гүлнар Тұрапбай ағылшын Оакли Келсиді айқын басымдылықпен ұтса, одан кейін шаршы алаңға көтерілген Айдана Жабынбекова (-57 кг) хорват қызын 4:1 есебімен ойсырата ұтты. 

Ал 63 келіге дейінгі салмақта Аружан Жаңабаева да қарсыласына мықтылығын мойындатты. Ол 1/8 финалда венгриялық Диана Чифрамен кездесті. Қазақстандық боксшы қарсыласын 5:0 есебімен таза жеңді, оның үстіне үшінші раундта венгриялықты нокдаунға түсіргенін де айта кетейік. 

Енді ертең өтетін 1/4 финалда Аружан түркиялық Полат Берфинмен жұдырықтасады. 

Ал 75 келідегі Анастасия Баязитова қытайлық Шиан Лимен жұдырықтасып, төрешілердің ортақ шешімімен жеңіліп қалды.

Естеріңізге сала кетейік, осыған дейін алғашқы жарыс күні қазақстандық боксшылар қандай нәтижеге қол жеткізгенін жазған болатынбыз.