Студент қызды соққыға жыққан оқушының әкесі Антикорда жұмыс істемейді

ӨСКЕМЕН. ҚазАқпарат – Өскемен қаласында әжетханада студент қызды соққыға жыққан оқушының әкесі Антикорда жұмыс істейтіні туралы ақпарат шындыққа жанаспайды. Бұл туралы ҚР Сыбайлас жемқорлыққа қарсы іс-қимыл агенттігі Шығыс Қазақстан облысы бойынша департаментінің басшысы Денис Шакенов мәлім етті, деп хабарлайды ҚазАқпарат тілшісі.

Наурыз айының соңында «АДК» сауда үйінің әжетханасында колледжде оқитын бойжеткен соққыға жығылған болатын. Кейін әлеуметтік желіде бойжеткенді ұрған оқушы қыздың әкесі Антикорда қызмет ететіні жайлы ақпарат тарай бастады.

«Әлеуметтік желілерде «АДК» сауда орталығында болған оқиғаға қатысушылар мен ШҚО Сыбайлас жемқорлыққа қарсы қызметте жұмыс істейтіндердің бірінің туыстығы туралы ақпарат шындыққа сәйкес келмейді. Оқиғаға қатысқан адамдардың Антикор қызметкерлерімен ешқандай туыстық байланысы жоқ.

Осы ретте, әлеуметтік желілерді пайдаланушыларға ҚР Қылмыстық кодексінің 274-бабы 2-бөлігінің 3-тармағына сәйкес бұқаралық ақпарат құралдарын немесе ақпараттық-коммуникациялық желілерді пайдалана отырып көрінеу жалған ақпарат таратқаны үшін 3 жылға дейінгі мерзімге бас бостандығынан айыруға дейінгі қылмыстық жауаптылық көзделгенін ескертеміз», - дейді ол.