Су басқан Құлсары қаласында 100 үйдің құрылысы қалай жүріп жатыр
АТЫРАУ. KAZINFORM – Атырау облысындағы Құлсары қаласында 100 үйдің құрылысы жүріп жатыр. Бұл үйлерді қыркүйекте пайдалануға тапсыру көзделген.
Жылыой аудандық әкімдігі баспасөз қызметінің мәліметіне сүйенсек, қазір тұрғын үй құрылысын 8 мердігер жүргізуді қолға алған.
«Құлсары қаласында салынып жатқан 100 үйдің құрылыс жұмыстарының қарқыны артты. Құрылысты жүргізетін мердіігер мекемелер көбейді. Қазір мұнда 75 үйдің іргетасы құйылып болды. Ал, 51 үйдің қабырғасына тас қалау жұмысы аяқталды. Қабырғасы көтерілген 5 үйдің төбе жабындысын жабу басталды. Құрылыс-монтаждау жұмыстары бекітілген кестеге сәйкес жүріп жатыр. Құрылысқа жергілікті 8 мердігер мекеме тартылды», — деп хабарлады аудандық әкімдіктің баспасөз қызметі.
Еске сала кетелік, бұған дейін Атырау облыстық құрылыс басқармасының бөлім басшысы Дархан Тілепбергеннің мәліметінше, Құлсары қаласындағы «Болашақ» шағын ауданында 100 тұрғын үй салу көзделгенін айтқан еді.
«Жаңадан салынуға тиіс 80 үй „Қазақстан халқына“ қоры бөлген қаржыға салынады. Ал, 20 үйдің құрылысы жергілікті бюджет есебінен бой көтереді. Қыркүйек айында 100 үйді пайдалануға тапсыру көзделіп отыр», — деді Дархан Тілепберген.
Ал, «Қазақстан халқына» қорының баспасөз қызметінен мәлім еткендей, Атырау облысының Құлсары қаласында 80 тұрғын үйдің құрылысын жүргізуге 2 млрд 640 млн теңге бөлінген. Мұнда 1 үйді салуға жұмсалатын қаржы 31 млн 975 мың теңгені құрайды.
Типтік үлгідегі жаңа үйлердің әрқайсысының ауданы — 100 шаршы метр. Құлсарыда жаңа тұрғын үйлермен бірге 2 мың орындық Binom мектебін, 300 орындық балабақша нысанын салу жоспарланған. Сондай-ақ шағын аллеялар салынады.
«Тұрғын үйлердің авторлық дизайнын „ETALON PROJECT GROUP“ ЖШС дайындады. Бұл серіктестік дизайнның сақталуына бақылау жүргізеді. Ал, техникалық қадағалау „ZAF-Стройсервис“ ЖШС-ға жүктеліп отыр», - деп мәлім етті қордың баспасөз қызметінен.
