Су тасқыны басталса, жергілікті басшылар шешім қабылдай алады – ТЖ министрі

АСТАНА. KAZINFORM – ҚР Төтенше жағдайлар министрі Шыңғыс Әрінов Үкімет отырысында су тасқыны жағдайына қандай техникалар әзірленгенін және қандай жоспар құрылғанын баяндады.

«Шыңғыс Сайранұлы, егер ахуал күрт нашарлап кетсе, қандай шұғыл шаралар қабылдайсыздар? Жоспарларыңыз бар ма?», - деп сұрақ қойды ҚР Премьер-Министрі Олжас Бектенов Үкіметтің бүгінгі отырысында. 

Өз кезегінде Шыңғыс Әрінов қажетті жоспар әзірленгенін айтты. 

«Көктем» оқу-жаттығу аясында бәрі тексерілді – 39 мың адам мен күш құралдар, 11 мыңға жуық техника, 400-ден астам жүзу құралы, 18 тікұшақ және 3 мыңнан аса мотопомпа дайын. Мұның бәрі тез жұмылдырылады. 

Сондай-ақ менің тарапымнан өңірлердегі төтенше жағдайлар департамент басшыларына тиісті құзырет берілген. Олар тез арада ешқандай бюракратиясыз, келісімсіз шешім қабылдай алады. Министрлік тарапынан барлық координация іске асырылады», - деді Төтенше жағдайлар министрі. 

Премьер-Министр кез келген жағдайға дайын болу керегін тапсырды. 

Бұған дейін Шыңғыс Әрінов көктемде еліміздің 10 өңірінде су тасқыны қаупі болжанып отырғанын айтқан еді.