Су тасқынынан зардап шеккен диқандарға қарызға тұқым беріледі – министрлік

АСТАНА. KAZINFORM – ҚР Ауыл шаруашылығы министрлігінің ресми өкілі Олжас Тілебалдин су тасқынынан зардап шеккен диқандар туралы әңгімеледі және астық қоры жеткілікті екенін айтты.

«Тұқымдық материалдар сақталған астық қоймаларын су басып жатқаны туралы хабарламалар бар. Осыған байланысты біз бірінші кезекте шаруаларға үндеу айтамыз: су басу қаупі төнген жағдайда өз мүлкіңізді дер кезінде қауіп-қатерден қорғау өте маңызды. Әңгіме тек тұқым туралы ғана емес, ауыл шаруашылығы техникалары, жануарлар және қауіпсіз қашықтыққа тасымалдануы тиіс өзге де мүліктер туралы болып отыр», - деді спикер Республикалық ақпараттық штабта өткен брифингіде.

Оның айтуынша, «Азық-түлік корпорациясы» ұлттық компаниясында, сондай-ақ Ауыл шаруашылығы тәжірибе станцияларында алдағы егіс науқанына қажетті астық қоры жеткілікті.

«Азық-түлік корпорациясы зардап шеккен шаруаларға бөліп төлеу шартымен тұқым беруге дайын. Тұқымға қажеттілік туындаған жағдайда шаруалар ҚР Ауыл шаруашылығы министрлігінің сенім телефондарына хабарласуы қажет», - деді О.Тілебалдин.

Жедел желі жұмысы 9.00-ден 18.30-ға дейін (7172)573358, 87470943381 нөмірлері бойынша істейді.

Сонымен қатар, pavodki_kz_bot телеграмм-боты тәулік бойы жұмыс істейді.