Судьяны тыңдамаған Бишімбаевтың адвокатына қатысты сот шешімі шықты

Судьяны тыңдамаған Бишімбаевтың адвокатына қатысты сот шешімі шықты
Фото: Жоғарғы сот

АСТАНА. KAZINFORM – Экс-шенеунік Қуандық Бишімбаевқа қатысты қылмыстық істі қарау барысында бірінші сатыдағы сот оның адвокаты Ерлан Ғазымжановқа жеке қаулы шығарды. Бұл туралы елорда сотының баспасөз қызметі хабарлады.

Еске сала кетсек, бұрынғы министр Қуандық Бишімбаевтың сот отырысында оның адвокаты Ерлан Ғазымжанов судья тарапынан бірнеше рет ескерту алған еді.

«Адвокат Ерлан Ғазымжанов іс жүргізу кодексінің талаптарын біле отырып, судья айтқан талаптарға бағынбай, сот отырысы залында тәртіпті бұзды. Осылайша, адвокат судьяға құрметсіздік танытып, сотқа немқұрайлы қарады. Адвокаттың атынан түскен жеке шағымның дәлелдері расталмады, өйткені төрағалық етуші судья ҚР Қылмыстық іс жүргізу кодексі 57-бабының талаптарын сақтай отырып сот отырысын өткізді», - делінген хабарламада.

Осылайша, Астана қалалық соты қылмыстық істер жөніндегі сот алқасының 2024 жылғы 28 мамырдағы қаулысымен адвокат Е.Ғазымжановқа қатысты бірінші сатыдағы соттың шешімі өзгеріссіз қалдырылды, яғни адвокаттың жеке шағымы қанағаттандырылмады.

Сондай-ақ, елорда соты аталған актінің заңды күшіне енгенін айтып отыр.

Айта кетейік, бұған дейін Қ.Бишімбаевқа қатысты қылмыстық іс бойынша елорда сотына апелляциялық шағымның түскенін хабарлаған едік. 

Соңғы жаңалықтар
telegram