Суға батқан баланы құтқарып қалған Мемлекеттік күзет қызметі мамандары марапатталды

АЛМАТЫ. KAZINFORM – Биылғы 18 ақпанда Алматыда суға кеткен баланың өмірін құтқару кезінде көрсеткен батылдығы мен жанқиярлығы үшін Мемлекеттік күзет қызметінің маманы лейтенант Серік Абиров «Суға батқандарды құтқарғаны үшін» медалімен марапатталды.

Ал подполковник Талғат Қасенов, сондай-ақ майор Серік Ілияс «Қазақстан Республикасы ТЖМ Алғыс хатын» еншіледі.

«Азаматтық қорғау органдарының атынан баланы құтқарып, жедел іс-қимыл жасағандарыңыз үшін алғысымды білдіремін. Сіздердің білікті іс-әрекеттеріңіз бен азаматтық ұстанымдарыңыздың арқасында жазатайым оқиғанның болуына жол берілмеді», - деп атап өтті Алматы қаласы ТЖ департаментінің бастығы полковник Нұрлан Атығаев.

Баланың әкесі ТЖД-ға арнайы келіп, жауынгерлерге уақытылы көрсеткен көмегі үшін жылы лебізін білдірді.

Естеріңізге сала кетейік, сол күні сағат 17:00 шамасында адамдар қоғамдық бассейнге шамамен 5-6 жастағы баланың батып кеткендігін хабарлап, көмек сұрайды. Жғарыдағы азаматтар дереу алғашқы көмек көрсете бастады. Құтқарылған жеткіншек ес-түссіз жатқан еді. Лейтенант Серік Абиров ең алдымен каротид артериясындағы пульсті тексеріп, оның жоқтығын анықтады, яғни бала тыныс алмаған. Артынша ол жүрек-өкпе реанимациясына кірісті. Талғат Қасенов пен Ілияс Серік кеуде қуысын қысуды жүргізді.

Реанимацияның бірнеше әрекетінен кейін бала жөтеліп, тыныс алды.

Осылайша қызметкерлердің тез және сенімді әрекеттерінің арқасында жасөспірім құтқарылды.